【運動員網誌】上篇家姐講到我哋做評述嘅有趣經歷，由第一次家姐為2014冬季奧運評述，初嘗一下直播嘅壓力；第二次家姐為冬季亞運評述，當時我就喺比賽場館出賽，佢就聲稱話自己一路隔住螢光幕望住我比一路評述好緊張，詞窮到一個極點，我比完賽得知後心諗有無咁誇張；第三次係我為2018冬季奧運評述，𠴱陣我準備咗一大堆資料，始終奧運都係大賽，點知第一晚評述完咗返屋企，應該係太大壓力緊張過頭，嘔咗一段時間，萬幸嘅係我無在鏡頭面前出事，否則應該好大鑊！之後𠴱幾日習慣咗就無事，仲表現得唔錯；今次第四次嘅經歷就係首次我同家姐同場旁述，覺得我哋對花滑嘅著切入點有所不同，佢著重過場轉接，我則著重跳躍。從以往一齊評述嘅體育人身上真係獲益良多，令我有更多元化嘅角度看花滑。
30/5/2020星期六Sat 凌晨0100
31/5/2020星期日Sun凌晨0100
2/6/2020星期二Tue晚上2300
3/6/2020星期三wed晚上2300
進入正題，今日我想講嘅重點並非本地缺乏資源或者介紹花滑動作，而係探討香港花滑嘅發展趨勢。
訓練冰時對運動員嘅重要性
溜冰係一種非常依賴環境因素嘅運動，唔似長短跑有田徑場、籃球有籃球場咁方便，何況香港本身唔係落雪結冰嘅地方，所以冰場必然係私營機構在室內建成。正正因為私營冰場需要行商業路線營運，有時候會同港隊訓練時間上有衝突，對冰場黎講就係普及化同專業化嘅取捨。何況冰場尺寸有好大程度上影響訓練質素，隨着選手技術水平嘅進步，對環境既需求就愈來愈大。國外嘅冰場方針係培育運動員，每場冰時兩個鐘就洗一次冰，每段訓練時間可能冰上只有八至十二個運動員。反觀香港，通常只有最早嘅朝早八點至九半或最晚嘅夜晚十點至十一點半，以上嘅時間係指包冰時間先可以練習一整套連住音樂嘅比賽節目，相比專業訓練的確有一段距離，所以本地運動員出現到國外留宿訓練的情況，力求進步後回流代表香港出賽。
專業化嘅步伐
數年前花滑被列入香港體院精英A資助項目，亦歸功於香港運動員同協會爭取國際成績多年嘅努力。自從得到體院嘅支持後，本地花滑得到重大改革。首先可以講下最直接嘅訓練，雖然體院無一個公營冰場，但可以有效分擔協會在搞比賽同訓練嘅負擔，何況體院有醫療、健身房、體能導師等等有利因素，本地運動員嘅訓練比起以前更加系統化同埋專業化。其次係比賽名額，就以我自己舉例，2011哈薩克冬季亞運嘅花滑項目裡面只有我一人出戰，2017日本冬季亞運就派出四人出戰，體育專員楊德強先生亦有親身到日本觀賽，並向運動員同協會了解花滑在港發展嘅趨勢同難處。
仲有就係花滑選手嘅心態、目標嘅改變，雖然而家在香港溜冰主要仍然走課餘、商業路線，但比以前的確多咗人選擇走專業路線，簡單嚟講即係專業花滑條路明朗化。隨著推動花滑嘅發展下，行內行外嘅朋友比以前愈來愈多機會接觸花滑嘅大小事，無論遠至國際嘅比賽冬季奧運直播或者連續兩屆奧運冠軍花滑明星羽生結弦，近至亞錦賽於香港舉辦同埋全民運動宣傳，種種宣傳都可提高花滑在香港嘅媒體曝光率。
新冰場堀起對滑冰市場嘅衝擊
萬丈高樓從地起，擴大花滑市場嘅接觸面就等於打造專業化嘅地基，最直接方法就係興建新冰場，有好消息指出今年將會建成全新嘅冰場，相信香港冰界會有一番新景象。香港現時有六個冰場，雖然同行裡面嘅目標群組都係大同小異，但競爭性優勢卻各有不同。有啲採用服務差異化戰略，除咗提供冰上娛樂外，亦可以蓋上紅地毯搞個大型活動，由於冰場嘅地理環境優勢高，地大又空曠，容易引起更多商場顧客注意；有啲採用成本領先戰略，冰場通過降低成本令其成為同行中最低，從而在同一個目標群組嘅其他冰場身上獲取競爭性優勢；亦有啲採用聚焦戰略，透過瞄定嘅目標年齡、產品線或者地區，以便集中使用整個公司嘅資源更有效地服務選中嘅目標群。
究竟一個新冰場該如何定位？從資源基礎觀點去睇，較大嘅競爭優勢係地區，而對其他冰場嘅威脅就係可唔可以留住在原冰場嘅目標群。冰場環境、硬件配置相對難改變，所以人力資源成為第二大核心競爭能力。比如建立多元化嘅教練團隊、凝聚企業向心力都可以從市場中發掘競爭優勢。不過無論新冰場點樣定位都好，整體對市場嚟講係正面同埋有利，隨住普及化趨勢，目標群對花滑嘅需求會愈黎愈大，市場亦會相應得以擴張。雖然短期內香港眾冰場難免出現競爭，但我相信係良性嘅，因為放長線嚟睇會有更多初學生接觸呢項運動，高水平選手仲有更多訓練場地選擇。
最後總結，我由五歲開始接觸花滑，到而家都有將近二十年嘅光陰放在塊冰上面，從兒時志在參與課餘活動，到青年時專業訓練代表香港出戰，再到而家做評述員，可以更宏觀看待花滑，真係見證住冰界一個接一個嘅里程碑。我希望各方面在現代甚至係未來可以好好把握機會扶搖直上，展望更明朗嘅花滑之路！