【體路專訪】東京御台場海濱公園旁有奧運五環雕塑雄偉矗立，這五色圈圈引多少英雄競折腰，但雕塑之下成王敗寇，又有多少人燃盡青春力量，在陰影中望門輕嘆？五年前香港羽毛球女將張雁宜以些微之差緣盡里約奧運，曾經五環於她如孫悟空頭上的緊箍，越是掙扎，心裡越是痛苦；奧運後她痛定思痛重新出發，堅持五年成功爭得東京奧運女單入場券，鴻雁心願擺脫心理枷鎖，在東京的上空中翱翔高飛。
雁為候鳥，春天北飛遷徙，秋天南翔萬里，空中雁群成陣，一字齊飛，雄偉有序。2016年里約奧運前半年，當時才剛在羽壇冒起的張雁宜表現穩定，從排名推算半隻腳已踏入奧運女單賽事門檻，假如達標計分期滿前發揮正常，當年22歲的她勢隨世界前列球手躋身里約奧運的舞台。然而時至計分期最後半載突然寒風颯颯，首次爭取奧運達標的張雁宜力有不逮，連番失手，最後七場比賽中有六場首圈出局，結果世界排名被同門師姐葉姵延追上，埋門一腳與里約奧運失之交臂。
心態拖累 痛失里奧入場券
孤雁失群，回首當年倒灶經驗，張雁宜認為年少時被心態拖累，「自己係有少少情緒化，心情起伏比較大，呢個又係第一次爭奧運入圍嘅經歷，自己有好多高低起跌，但係比賽其實好講穩定心態同埋發揮。」她指自覺訓練身心如常，但壓力已悄然進佔，「嗰段時間爆暗瘡爆得比較勁，本身又唔覺得自己日日咁練好辛苦，但身體上有好多訊號反映咗出嚟。」羽毛球極重氣勢，兩軍能力相若隔網對峙，心態盛衰致一兩板手鬆手緊足左右大局，當屆張雁宜於最後幾場比賽皆抽中排名較高的球手，有人以此為激勵，遇強越強，見佛殺佛；偏偏張雁宜卻自以為時不我予，於牛角尖中鑽了又鑽，「最尾嗰幾站係深刻，當時積分比較近，但最尾嗰幾站籤運冇咁好，對親嘅對手都係最強嘅幾位，當時覺得運氣唔夠，諗嘢會比較負面，諗返覺得自己太過執著喺呢方面，反而忽略咗點樣提升自己。」
讀書正正常常一路去，好似好穩定咁，但做運動員都係得十年八年時光，錯過咗就冇。
無論觀看張雁宜比賽，或是訪問對談，總覺她情緒有點繃緊，似是心事重重，彷彿被大石壓住，拍攝硬照時我見她眉頭緊鎖，遂問她長大後打羽毛球之樂與兒時相近嗎？此刻她才莞然一笑，「細個打波唔睇成績唔同㗎喎。」小學時她隨父母假期餘閒學羽毛球，小三、四左右已加入體院訓練，不少球員讀畢中三即輟學全職投入訓練，但張雁宜考畢會考依然十五十六，「我唔係個好頂得好捱得嘅人，但做運動員一定好刻苦好悶， 自己未必頂得順，同埋如果打唔好，之後前景又可以點樣接駁返呢？」她思前想後，會考成績不俗的她結果還是選擇踏上運動員征途，「讀書正正常常一路去，好似好穩定咁，但做運動員都係得十年八年時光，錯過咗就冇。」前途似是光明又是茫茫，我好奇有何誘因驅使她下定決心，她笑說：「因為真係冇得再拖喇，我係拖到中六開學最後一日先打電話返去話要退學。」
因為不甘心 所以一直堅持
體育之所以引人入勝，只因運動員非揮拍機器，而是有血有肉有情緒有低谷的活人，張雁宜坦白自道「怕辛苦」，讀書時要兼顧學業，偶爾會偷懶缺席訓練；轉為全職後，羽毛球成為日常避無可避，她憶述曾無數次想過要放棄，「開頭由朝到晚咁樣練，身心都好辛苦，有時練完會喊，而且成績不如自己預期，一路都覺得好辛苦，覺得自己進步唔到咁。」說着說着，張雁宜好像眼泛淚光，她說17歲轉全職時以三年為限，假如成績尚可則留隊再戰，否則便舉手離場，結果三年又三年，她堅持續披港隊戰衣，里約奧運她身心俱疲，我問是否想過就此罷了？「我都想放棄呀，比賽始終運氣係個因素，但自己都冇運氣嘅，條路咪更加難行囉。不過轉個諗法啦，運氣係因素啫，但更大部分係掌控喺自己手上面。」然而16年她短暫休息過後，再次返回隊中，她說留下來其實是不甘心，「我對自己係有要求，情緒雖然想放棄，但我覺得自己總係有嘢未做好，一路覺得可以做得更好，所以先一路堅持埋佢。」
張雁宜心有未了之願，但迷途之雁須同伴前輩領航歸列，她指年少時正因教練王晨鼓勵，打下強心針才決定退學入港隊；入隊後愁悶失意，亦靠王晨從旁指路，「唔係好記得係邊場比賽，我已經輸到覺得自己太差喇，走去同教練傾訴，我記得佢問我『你盡咗力未？仲有冇得去改善？』，淨係呢兩條問題啫，我心入面已經有答案，我仲可以推得自己更多。所以王晨對我都影響大，如果唔係佢，我未必留到喺港隊咁耐。」跌過痛過，站起來抬頭拍拍灰塵又是一條好漢，16年下半年張雁宜重整思緒，接連於香港及丹麥公開賽殺入四強，鴻雁一鳴驚人，「如果我有困惑我好需要諗明白，如果唔係就會停滯咗喺一個位唔知做啲咩好。當時兩個比賽都入到四強算係我嘅一個突破，最主要係心態上，之前已經做得唔好喇，放開咗都冇咩好輸啦，唔諗太多複雜嘅嘢反而可以發揮到。」
我暫時都未係可以話證明到自己，但我可以話入到奧運係繼續堅持落嚟嘅結果。
從里約的23歲走到東京的28歲，幾年前張雁宜世界排名曾穩居前20，雖然近年受跟踺傷患困擾，排名跌至30左右，但最終仍能平平穩穩殺入奧運，達成五年前的目標。得到了，但張雁宜的心情又未見得舒坦，她上次於國際賽報捷已是19年的澳門公開賽，她嘆道久違勝利和比賽的感覺，自問未來需要更好表現才能證明實力，談奧運只望盡力而為，「我暫時都未係可以話證明到自己，但我可以話入到奧運係繼續堅持落嚟嘅結果。」疫情大亂體壇，雖說換來時間養傷，但整整一年缺戰等待卻成心頭負擔，尤其之前奧運存亡未定，曾經教她忐忑不安，她慶幸最終仍能殺上最後直路，「我心態都幾複雜，除咗睇排名成績，身體傷患有困擾，就算去到呢個關頭，但現時身體狀況下又發揮到幾多呢？只能夠一步一步去調整，行到而家最尾喇，思想係比之前清晰咗，好想盡力去發揮。」
前路如何無人得知，但風起了，雁群又要準備起飛。訪問過後我叫張雁宜拿起球拍輕挑羽毛球拍照，忽然怪風吹過，羽毛球甫離拍即隨風吹送，一下子飄到體院對外河道之上，天有不測風雲，這也無何奈可。後來我翻看相片，發現原來剛巧記錄了羽毛球失控一刻，相中的張雁宜狼狽控球，笑得靦腆但又喜眉歡欣，或許有時放下包袱，簡簡單單，開心無愧便足矣。
文：洪量丰 / 圖：洪量丰、受訪者提供
《體路》繼上屆里約奧運成為本港首間採訪奧運的的網上媒體後，將再次派出採訪隊出發東京現場直擊東京奧運會，為讀者帶來最新奧運港隊消息，《體路》東京專頁已面世，全方位為讀者報導最新港隊戰報、香港奧運之代表專訪，亦有奧運項目介紹，歷史資料等，今個暑假，與你一齊 #撐起港隊！ 專頁：https://tokyo2020.sportsroad.hk/