【體路專欄】投資銀行有一個好怪雞的傳統，每做完一單deal，就會整一個tombstone，如果照翻譯，tombstone中文是墓碑。你話係唔係痴痴地，無端端整個墓碑俾自己，仲要周街派，個個banker爭住要。越高級就越多，擺到成間房都係，簡單來說是一個墳場。你話如果你搵日返屋企同阿媽講話自己有幾叻幾威，然後送個墓碑俾她，佢唔搵菜刀斬你？但講你都唔信，我間銀行真係有條癡孖B，專門拿人地唔要的墓碑返屋企。問佢拿咁多返屋企係唔係當飯食，佢話唔係，原來佢顛到拿返去俾阿媽話公司頒左個獎俾佢。
Anyway，在投行的世界裡每一個tombstone就基本代表了一個獎牌，每做完一單就有一個獎牌。獎牌除了代表”成就”外，還算是一種記憶，至少你知道過去做左乜，但這些都是非常表面的。即係咁，如果你求其係我面前拿起一個tombstone問我在這個deal做過乜，我可以說客戶是誰，什麼時候做的刁，有咩bank，size幾大（因為寫哂系到），但其他深入點的，就好大機會講唔到俾你聽。
點解？因為其實單deal做得有幾大，pricing有幾好，或幫間bank賺了幾多錢都好，自己本身個人意義不大。每一單deal都咁多家銀行，每個銀行都有幾隊team，N個MD/ED，講真，我話對單deal好有貢獻，你都不信啦。做得好，可能年尾花紅會多一點，但如果你不是很大支野的coverage banker，那花紅大極有個譜。很多人會話banker好高人工，靚車，住洋樓，對的，我們的確是高人工，但也非你看Wolf of Wall Street 的那麼誇張。
第一，那是90年代，第二，佢地犯法。最重要的第三點，投行裡的花紅是不能全部帶回家的。花紅總體可以分作兩個部分，現金和股票（但不能即時套現，要等一到四年不等 – unvested shares)。但銀行絕對不是好蝦的，當市場不景氣，第一刀就會是員工，一些比較有創意的銀行會有，deferred cash（要等幾年先有的現金，仲有可能要跟自己個team，group，或銀行在未來的表現掛鉤），自己銀行的CoCo （銀行資本的其中一種，是風險比較高的一種，如果銀行資本有問題，你就第一個瀨野），或是用金融高科技重新包裝過的高風險資產（絕大機會瀨野的資產）- 簡單來說，銀行同你攬住搏一鋪，輸左大家一起跳落火坑。I don’t want to state the obvious, but現金永遠都是最小的部分。小弟試過，50%的花紅是股票，股價在一年內跌50%。亦聽見過有個senior MD，出奇咁忠心，咁多年來收到的股票，一張都無賣過，最後銀行被國有化，仆直。
反過來說，從鐵人賽中拿到的每一個獎牌，我都可以道出一個故事，親述過中的每一段過程，什麼時候緊張，什麼時候痛苦和什麼時候開心。每一個獎牌都是我一手一腳拿的，從訓練到比賽中怎樣突破自己，點滴在心頭。還記得我完成了第一個鐵人賽後，全身的肌肉都很疼，看著手裡的獎牌，雖然只是一個 finisher medal但面上不期然地流露出笑容，而心裡是滿足的，至今還記憶猶新。
在我的字典裡，獎牌是標誌著一段段有意義的回憶，值得回味，而tombstone則是標誌著一單單deal的光榮死去，值得回憶的可能只有那個bank的analyst好似幾索。既然如此，那墓碑還是留給有需要的人，我還是去追尋我的下一個獎牌和當中的經歷吧。