每年o既5、6、7、8月，即係記協盃休季時間，差唔多等同夏體硬抖暑。以往呢o的日子，富足主都係忙於新球季組軍同埋傾贊助，等國足主可以日日搔腳趾，不過由於今屆歷史性捧盃，梗係要搞大o的。唔怕老實同大家講，我o地正o係度部署緊一連串慶祝活動。
首先，o係各執委籌備之下，我o地已經o係百樂門訂o左幾圍，同各位隊友以及贊助商玩番晚。富足主偷聽到國足主傾電話，知道仲好可能會有抽獎環節添。至於新鮮出爐o既「夏體硬足球先生」可樂暉，當晚亦會出席發表得獎感受，至於臨時加插表演會係接波甩手定係被笠死呢，就要睇佢老人家心情喇。
為o左紀念可樂暉今次得獎，除o左全晚飲品劃一飲可樂之餘，慶功宴菜單亦會以佢命名，例如：「可樂暉與豬拚盤」、「可樂暉乞兒煲雞」、「可樂暉煲老藕」、「可樂暉生椰菜花」、「可樂暉食貓麵」、「可樂暉彈琵琶露」等等。本來仲有一味「可樂暉如廁」，不過國足主話驚環保組織詐型，於是改做「可樂暉係咁湯」……唔……真係諗起都反胃，到時要去Ｍ記打定底先。
另外，有見近期隻膠鴨咁受大家歡迎，我o地就研究緊整個吹漲o左o既可樂暉擺o係維港。岸上面亦會擺個真人o係度，歡迎大家合照及踐踏。大家仲有咩好建議，不妨留言話畀我知啦。
富足主
