【體路專欄】先恭喜一下自己隊波先，話說分組賽落筆打三更輸俾我老東家新報之後，夏體硬係記協盃先贏新傳媒，再贏蘋果，戲劇性首名出線八強，成班開心到好似捧盃咁！
或者有人會問，夏體硬之前幾年一直都係四強之列，係舊年運氣爭d射輸9碼八強出局，點解今年單係分組賽出線都咁興奮呢？
其實係咁既，話說舊年出局之後，足主我都知恥近乎勇，同幾個老臣子（當然無叫富足主）開檢討大會，結論就係夏體硬咁多年都係打穩守突擊太過保守，戰術俾人睇穿之餘進攻又欠章法，以前就話靠個人技術搭夠，但成班人不經不覺又老一年，對住越黎越多後輩參加既記協盃對手已經無優勢，所以足主我就請黎澳滌教練堅Sir，為我地提供針對性訓練，不過都係果句啦，改變係須要時間既，大家睇下雲高爾教曼聯要幾耐先爬番起身，就知要大執一隊波係要俾D耐性。
所以，當成班人經歷分組賽第一場撻Q既失落之後，個個都知道唔能夠再食老本，操練時加多三四錢肉緊，就連無份踢記協盃只係場邊食花生既贊助商BILLY都練埋一份，結果就係成隊上下一心，大勝新傳媒再贏蘋果，由失兩球輸2比3變到兩場入七球兼無失波，成隊人個個有得著，所以咪開心X2囉！
開心左只係一日，球圈又發生左單不幸事，就係省港盃次回合，黃威俾廣東隊既盧琳一腳重創，雖則落筆時仲未知要抖幾耐，但睇比賽片段，黃威隻腳俾盧琳踢到變形咁滯，相信坐底都要抖半年，即係話下半季澳滌既賽事都唔洗預佢。
雖則話省港盃唔係A級賽事，但話曬都係太公波，球會同球員都係義務性質，重傷真係會連累球隊成績，堅sir就喊咁口喇，希望波總今次識做啦，如果唔係將來省港盃，真係要「搵鬼踢」架喇！
國足主
