【體路專欄】冇見一排，又輪到我富足主登場，記得我嗎 有掛住我嗎？
喺度交代一下最近幾個月發生嘅事先，小弟已經轉咗飯鑊，離開咗服務16年嘅報館，轉投一間職業球會，做全職KEYBOARD FIGHTER（鍵盤戰士）。有冇唔捨得？唔多唔少梗有啲，不過凡事要向前看，尤其依家份新工都幾合心意，起碼做嘅嘢都係比較正路，唔使再鬼鬼祟祟做埋狗仔隊呢類厭惡性工作，真正為足球出一分力先，搵多搵少呢啲已經唔係最重要。
新一屆記協盃已經開咗波，今年犀利喇，角足主一到就嚟開咧就話要打正選，結果我哋要臨急臨忙搵堅SIR執佢二攤，代佢調兵遣將。大家都知陣前易帥係兵家大忌，加上我哋只係跟堅SIR練得一課，你估真係神童咩，結果就落筆打三更，輸咗2比3，創下近年開季最差紀錄。
今日（12月27日）就踢第二場，角足主今次仲未識死，話要打埋龍門添！唉，學基大話齋，「知所進退先係大智慧」，醒啦喂！
富足主
