【體路專欄】尋晚同富足主食雞煲，富足主一路食雞一路雞啄米咁Ger住我。
「唉，今屆又入唔到決賽，真係唔知係無拜神定係拜錯神喇！」
「又話要搵教練，點知練完都係唔掂」
「喂，你有無睇新聞呀？人地白禮達都落台啦，領導無方果d人呢，就唔好要人講到出口喇！」
「搞咁多野，決賽都入唔到，點交代啊？點交代啊喂？下？」
「搞隊波搞到咁，會唔會有野宣布啊？係就快喇！」
由坐低落單，到雞煲黎到、煲滾，佢就一路無停口係咁GER GER GER GER GER，終於我忍唔住拍檯起身，同佢講：「睇波咁多年，你識唔 _ 識波架？」
由於我拍檯呢下實在百感交集，集合左溫度速度溫柔和憤怒，成間舖d客都望曬過黎，不過我當時眼中，就只得富足主一個，果一刻我實在恨鐵不成鋼，點解眼前呢個曾經咁尊敬既人，咁多年黎都係掛住搵位入我掛住內鬥而唔好好搞下隊波既內務？
「你睇下拜仁慕尼黑，連續兩年入唔到歐聯決賽，兩年都係四強唔知發乜神經輸波出局，成隊波有無話內鬨搞小圈子搞分化？咪一樣咁團結；你睇下香港隊，近年戰績唔算好，世界排名跌到一百六十幾位，一張俾人串到上心口既海報擺出黎，旺角場都即扯紅旗，大家都一條心黎支持同撐起呢隊波，老友，邊隊波無低潮架？若然一輸波就要搵人開刀祭旗，咁邊個仲有心機繼續踢好呢隊波？」
富足主聽完，唔知係咪感動得滯，當堂流下兩滴鱷魚淚「賢弟，我真係對你唔住，我好後悔之前做咁多咁多傷天害理既野，從今以後，我地兩兄弟一齊搞好隊波佢」講完之後，我地就好似安信兄弟咁流住眼淚又拍曬膊頭，一路食雞煲一路商量未來大計。
直到，我聽到鬧鐘響…
原來係南柯一夢。
今個星期日，6月14號朝早9點半，九龍灣啟歷學校天台球場踢既季軍戰，我又要係富足主既冷言冷語之下為夏體硬上陣…真係諗起都想喊。
國足主
