富足主同各位網民一樣，一到o左星期二/三/四，就會上o黎呢度，關注o下夏體硬o既消息。可惜吖，上個禮拜手㩒到F5都爛埋，竟然見到一篇FF文，不其然嗌o左出聲：「乜咁大o徙啊？」
一直以o黎，會方都好珍惜每一個可以宣傳球會o既機會，當然你話要做到一個post一張相每次都係o個幾個人share，就太過hard sell喇，人唔笑狗都吠啦，但係對於呢個地盤，就從來都係高度重視，因為唔想浪費o左一個咁好o既平台，點知足主竟然交hea稿，真係不禁令人搖頭歎息。
所以富足主就有個新構思，反正我o地隊中有唔少球員自命風流才子，與其o的人寫成點都肯定有得寫，不如就引入停賽制度。例如每段稿被like次數少過某一個數目，就罰佢下周停賽，等其他隊友接上，防止有人又寫hea稿，唔知足主願唔願意接受挑戰呢？
仲有，足主早前私自搞o左個小圈子足球先生選舉，諗住再捧一捧佢心腹可樂暉，搞到唔少隊友有意見。大熱倒灶o既陳小明（假名）仲同富足主講，點解可樂暉事前根本冇提名都可以得獎？咁我當時就求其敷衍佢，解釋因為可樂暉今季表現有進步，特別係少o左蝦碌，加上平時點玩都唔駁咀，可能因為咁先得足主歡心啦。點知小明聽完就仲躁，話咁點解唔索性頒個「每月最乖」畀可樂暉喎。之後小明仲威脅要離隊，又發悔氣話以後改著三間（實情係佢依家返工已經日日著），唉，麻煩足主下期回應下喇。
富足主
