【體路專欄】南華籃球隊上星期於銀牌決賽，憑著隊長惠龍兒及羅意庭合轟50分下，成功擊倒永倫衛冕。但短暫歡呼過後，南華球員又要再次「歸位」，繼續為甲一聯賽再搏過。然而，搏命嘅除咗有香港嘅南華球員外，各位又記唔記得佢哋仲有一位正身處韓國、追尋緊職業籃球夢嘅香港球員呢？冇錯，佢係周健宏，人稱「肥宏」，正為10月嘅KBL選秀而努力。為咗讓讀者了解下「肥宏」嘅最新狀況，今次小記決定遠赴韓國，去探訪呢位追夢港男。
開始之前，小記就先交待下點解「肥宏」會喺韓國先。「肥宏」其實已經喺韓國讀書四年，佢上年更曾經參加過當地職業籃球聯賽KBL選拔，雖然當日做出「雙雙」，但可惜最後都未獲當地職業隊垂青。縱然充滿遺憾，不過正所謂「邊度跌低邊度起翻身」，「肥宏」決定再比一次機會自己，在韓國再留一年，為韓職夢再搏過。
好，出發！「肥宏」就讀嘅明知大學其實孕育過唔少super star，例如有前曼聯球星朴智星、女子組合Sistar嘅寶拉、仲有近期紅到發紫嘅韓星朴寶劍，都係明知學生。至於「肥宏」就讀嘅運動部位於京畿道龍仁市，離首爾市中心都有差不多一小時車程，所以「肥宏」亦一盡地主之誼，專程由宿舍坐巴士出江南請小記先食午餐，再一齊坐巴士翻學校。
話咁快，經過大約1小時車程，終於去到明知。其實原本想拍攝一下「肥宏」平時訓練有幾癲，但原來今日咁啱撞正明知要同一間高中打友誼賽，所以佢哋暫時都唔洗操。不過都好，小記可以趁機會觀摩下當地嘅籃球水平。
步入體育館一刻，其實已經睇到「嘩嘩聲」，因為區區一間大學嘅體育館就已經有兩個修頓室內場咁大。「肥宏」話呢個體育館係當年為奧運而興建，但比起首爾某些名牌大學已經唔算大。雖然舊就舊啲，但係設施就相當齊全，最特別係佢連觀眾席上面都有健身器材，唔怪知個個球員都練到咁大隻。
之後我跟「肥宏」入去場館內嘅會議室，原來每逢賽前或賽後教練都會於入面講解戰術。仲有唔講唔知，原來韓國人係相當重視輩分，所以球員對教練都會好恭敬，至於一年級生見到師兄除咗要鞠躬問好外，打掃、斟茶遞水呢啲都係基本嘢，肥宏話自己當年都熬過，但呢啲情況我諗喺香港都真係幾難見到。
友誼賽開始前，「肥宏」話先帶我去見下佢教練金南杞。之前都知韓國嘅籃球教練出曬名「嚴」，有時體罰呢家嘢就不在話下，「肥宏」更笑指曾經試過做錯事比教練一塊戰術板「兜巴車」，所以攪到小記當場都有啲擔心。話咁快教練就到咗，我即刻運用僅有嘅韓文知識先講句「阿你呀say喲」，未知金教練係咪見我遠道而來，所以都好有禮貌地同我打招呼，仲叫我隨便慢慢影㖭。
稍稍熱身後，友誼賽亦都開始。近年喺香港都冇咩機會見到「肥宏」打波，雖然只係一場friendly，但都睇得出「肥宏」搏曬老命，絕無hea打。至於技術上亦進步好多，尤其身體對抗性方面，完全睇到當年佢在香港時嘅分野。令人意外唔單止有肥宏嘅進步，仲有對方高中生隊嘅表現。可能大家會以為高中生同大學生冇得打，但如果咁諗就大錯特錯，因為原來韓國高中籃球真係好高水平！講嘅唔止進攻上，而係防守上！講真場波真係幾悶，但原因唔係佢哋打得差，相反係佢哋每一球都守得好好，基本上唔會見到「走甩人」嘅情況出現，雙方都難以起手下所以先攪到冇咩波入。「進攻贏觀眾，防守贏冠軍」，就係咁解。
見識完韓國高中籃球水平後，終於可以參觀下「肥宏」平時嘅生活地方。大學生活，仲要韓國，仲唔係多姿多彩？其實去之前小編都係咁諗，但現實與幻想，往往都係會有出入。頭先講咗，其實明知位於市郊，學校附近除左有幾間食肆外，就只得一間coffeshop，所以話五光十色嘅大學生活，只係適用於部分留學生。
至於呢個宿舍裏面只有運動部同學會住，雖然舊但勝在五臟俱全，飯堂、澡堂、休息室基本設施都有，另外仲有專嘅的物理治療師喺度，令運動員可以安心訓練。不過講到尾，唔洗諗呢度嘅學生會有咩娛樂，呢度個個只會為自己嘅運動職業夢進發，就好似肥宏話平時除咗練波讀書之外，就係練波讀書。艱辛過後，喺呢個宿舍到瞓教已經係佢最大娛樂。
今季KBL選秀將會在10月展開，「肥宏」就話今個暑假要專心備戰同養傷，所以都唔會翻香港幫南華坐陣，所以咁多位球迷幫南華打氣時，記得要繼續支持喺韓國嘅「肥宏」喇！
後記：
總結今次旅程，可以話大開眼界，當中有幾方面係令小記都覺得幾讚嘆。第一樣係韓國呢種尊師重道、同講求輩分關係。正所謂「一生為師，終生為師」，呢樣野確係值得香港嘅同學及球員們借鏡（當然唔包括體罰啦）。第二樣係當地學生們對籃球嘅付出，為咗自己夢想，佢哋真係除咗練波，就係練波。好深刻當日友誼賽後，就係因為一球防守做得不好，大家晚飯都冇食，只係在球場內默默加操，見到咁嘅情況，小記即刻諗起學生時代練波嘅日子，而家先發覺原來當年自以為辛苦，其實只係他人嘅九牛一毛。
最後，亦都係最重要，就係「肥宏」嘅毅力。坦白說以佢實力，在香港籃壇並不愁立足之地，即使唔打籃球，25歲嘅黃金之齡於香港仲有好多事可做。但正因為「夢想」兩字，結果佢選擇一個人去韓國「受苦」，就算上年跌低過今年都堅持要再試一次，單係呢份毅力已值得小編致敬。
其實小編係有問過Coach Kim，究竟「肥宏」同KBL仲有幾遠，當時佢就話：「其實混血兒在KBL有點輸蝕，因為過往有太多失敗例子關於引入混血或是歐藉球員。至於『肥宏』嘅身體質素其實很好，但在評審眼中表現可能只有6分，因為佢籃板和防守未做到最好，我希望佢今年可慢慢進步，因現時很多球隊需要嘅，正是呢類實幹型球員。」
雖然如教練所講，混血兒或會有秉輸蝕，但係「肥宏」就講明唔會放棄，會於今季繼續鍛練好：「我要做一個大家非選不可嘅球員！」失敗？So What！努力啊，「肥宏」！
圖、文：蘇子傑（部分相片由受訪者提供）