【體路專訊】夏體硬早幾日搞團年飯，除左陣中食家之外仲有體路老細阿菲同Carrie出席，認真俾面。
同場出席既仲有曾經踢過夏體硬，有夏體硬張立基（註：張立基係咸豐年代一位靚仔歌手，但WFC…）之稱既阿Ron都有出席，呢位靚仔球星近期已經去左電影界發展，將佢平時用係球場上既假動作用左落電影剪接既美感應用上面，又真係幾有美感。
佢同我講，話自從埋首學剪片之後，唔好話踢波，連同女朋友見面都少左，前排難得有一日放假，即時拉埋女朋友入場睇「南飛」大戰，睇完之後佢話本地波精彩左好多，覺得咁既戲碼唔應該咁少人入場睇，其實佢講得岩既，近年香港波唔單止南飛，就連傑志甚至橫濱都引入踢得既外援助陣，確實係比前幾年好睇左，不過無計，先唔講山雞計劃成唔成功，睇波呢樣野真係好講氣氛，有時球員入波之後激情咁叫下球迷起鬨係好正常，不過香港就係一個咁奇怪既地方，「o殊」下都要停賽，遲下球員可能要兼讀中外默劇課程，先可以合法表達入波既興奮。
同日出席既仲有前夏體硬鐵血中場Andy，呢位打不死中場係夏體硬第一次打入記協盃決賽既功臣，但歲月催人老，佢同我、副足主、阿駿同小環等，都步入業餘球員既黃昏期，開始要睇住夏體硬一班新人接班，還好，慶幸夏體硬都總算搵到人接班，唔似得本地波壇咁，斷左青訓之後搵條毛睇下都越黎越艱難。
老將當中既表表姐要算係小環，有人話家有一老如有一寶，呢句說話我十二分認同，因為小環就係一個好例子。
其實有睇開本地波既波迷，就算未聽過，都好大機會見過呢位老記者，不過呢個「老」字純粹係講佢年齡，佢老人家既心境比起好多人包括我在內仲要年輕，就咁講可能大家意會唔到，不如先黎睇佢既近照：
藍色長袖底衫、襯紅色波衫橙色波褲橙色鞋，咁既配搭如果要著出街，真係少D勇氣都carry唔到。
國足主
