【體路專欄】幾年前踢南華嗰陣，有一場比賽去到最後階段，因為我個人犯錯而導致球隊失波兼輸波，即刻成為全場被「問候」焦點。好唔容易，用咗幾個月去捱過呢段艱難時刻。作為後衛，即使你踢89分鐘好波，只要有一刻因你犯錯而導致球隊比賽失利，你會馬上成為眾矢之的，但點解仲有人甘願走去做後衛？唔通因為夠型，夠勇悍，鍾意飛鏟嘅感覺？其實通通都唔係，主要原因係進攻唔夠叻，哈哈！！環觀世界，究竟邊個後衛對我最具影響性？
呢個情況好多防守球員會選擇用腳尖將個波篤出界，但圖片明顯見到李奧費迪南嘗試以腳內側將個波踢入場內，繼而尋找可傳波選擇。（Photo Credit：Manchester United Youtube Channel）
後衛：李奧費迪南
無錯，答案係李奧費迪南！喺我角度，佢為防守球員踢出新定義，將世人對防守球員嘅定義同價值觀徹底改變。過去，眾人對後衛主要要求係成功阻擋及解圍，不過今時今日，呢個主要要求已經變成「基本要求」，喺演變過程當中，正正係李奧費迪南嘅出現。後衛除咗防守之外，適當時候要懂得策劃進攻，換句話講，足球術語上面就係「唔好淨係踢走個波！」例如面對高空波，喺無人看管情況下控落嚟、攔截後盤球擺脫對手及嘗試以傳波俾隊友取代一腳解圍。當然，整個過程要衡量對手可攔截距離、預計對手埋身時間、周邊可選擇傳球目標、對球賽情況預計等等因素，而李奧費迪南就能夠喺各個情況做出最適當選擇。
如此優雅華麗技術，想當年真係好少後衛能夠做得到。（Photo Credit：SharpeyCol YouTube Channel）
一夫當關 vs 一力承擔
路從來都唔易行，做第一個永遠都係辛苦。要成為完美型之前當然要交下學費，輕則犯小錯；重則累輸波。李奧費迪南身高腳長，自身安全圏非常龐大，因而對應高空波同「1 vs 1」有絕對優勢。其次，「李奧」本身速度不俗，較少輸身後波（年紀大咗黃昏期另計，哈哈），而佢最獨特之處係咁嘅身高都擁有非一般細膩技術，用波能力極高，往往能夠喺防守時候將個波送到隊友腳上，從而策動反擊。此外，「李奧」勇於引球推進，除咗可以將防線移前外，更重要係可以令負責進攻嘅隊友向前移動，喺更有利進攻位置出現拎波，同時向對手施加壓力，喺比賽中得到壓倒性優勢。成功固然好，但同時間亦要識得面對失敗。被譽為「高章型」踼法曾經令李奧費迪南吃盡不少苦頭，會面對由錯誤所產生被指責嘅壓力，真係談何容易！
曼市打吡戰踢得如此高章，結果……被追平3：3，李奧費迪南頓時成為全場「焦點」。（Photo Credit：Manchester United Youtube Channel）
諗返轉頭，承受過，經歷過，捱得過嘅壓力，先知道咩叫壓力。好記得有一次豪哥（陳偉豪）同我講過：「係人都會犯錯，越有經驗先至越有壓力，因為喺人哋嘅角度，覺得你係唔應該錯，亦都唔可以有錯。」其實，犯錯就等於學海無涯，邊有分咩年紀嫁，不過，錯就係錯，最重要係喺錯誤中學習，喺錯誤中成長，吸取教訓，避免重蹈覆轍。後衛們，落到場我哋要繼續緊守崗位，萬一出現失誤，千祈唔好自亂陣腳，要保持冷靜，繼續面對之後嘅挑戰！