前幾日同波友踢完波打茶，有人拎少林寺方丈俾人告單野出黎吹水，內容就唔詳述喇，大概都係有咁耐風流，有咁耐折墮之類既風涼話，有口痕友仲叫我小心D，因為大家同樣都係足主，我都風流左咁耐，因住乜乜乜咁話。
我份人呢，就不嬲都唔鍾意落井下石，更加唔鍾意用d咩「獌、鏝、猁」等等形容其他人既愛隊，皆因做左體記咁耐，真係無乜見過邊隊出名、有成績、多人捧既球隊係無負面新聞既，就好似少林寺咁，先唔講方丈球圈內外有乜行差踏錯，單睇佢呢幾年搵番黎既前荷甲執雞王、前七小福甚至而家陣中既前國腳，都可以睇得出方丈有擺心思落香港足球，當然成績同效果未必同預期一樣，但諗諗啦，如果無左佢，隊隊甲組好似七十年代咁老細足球搞成世，對港甲黎講係咪一件好事呢？
正如當初人人提出既山雞計劃咁，其實一向墨守成規既態度，係要變既，而且唔係陰d陰d咁變，而係從頭到腳黎個大轉變，如果想變但又要左遷右就，咁出黎既效果就不倫不類，以往方丈既失敗在於佢自己識變，但帶動唔到其他人一齊同佢變，變左就好似大家出去踢波，你明知隊波戰術有問題，覺得應該好似巴塞咁圍住人黎攻，但其他隊友就驚死，縮晒後面死守，結果就係得你一個衝出去燃燒體能，中場斷纜，守果陣後面又爭個，咁場波踢落去真係無乜前境，比賽就越黎越WFC了。
今日（3月22日）就係我地記協盃分組賽最後一場，由於我地已經贏曬之前三場，故此今場波如無意外就算輸都好都一定出線，不過由於我地夜晚又要出戰nike5分站賽事，我地陣中又有大批球員因為公務同私事缺陣，所以d波友都話聽晚我應該係FB俾人插到開花，又或者會俾富足主拉出黎鞭屍。
鞭屍，又有乜所謂，只要你終有一日撈得掂，你就會覺得受過幾多辛酸都係值得，希望在明天嘛，加油啦王維基，加油啦香港人。
Post Views:
2,180
