我國足主一向都係夏體硬最忠實o既球迷，係人都知o架喇，不過最近就比另一隊波迷住，呢隊波就係官恩娜…sorry我認我都好迷官恩娜，但我想講，呢隊波係大溪地。
（圖片來源：互聯網）
有睇報紙電視直播o既球迷都會見到，逢親講起大溪地，個個都例必會拎官ELLA出o黎提一提，基本上o係香港人眼中，官ELLA已經做o左大溪地o既代言人，無他o既，就好似提起夏體硬，個個都會諗起可樂暉咁（得ok唔洗提我，我知道唔可以再講可樂暉係咪？）
雖然今屆分組賽，大溪地一場都未贏過，仲比人當係魚腩咁數，但睇佢地果種堅持同毅力，就令我諗起當年o既夏體硬喇，話說當年夏體硬組軍初期，實力方面…可以話係記協盃當中o既大溪地，成隊得一兩個有踢開業餘比賽，其他呢？唔係頂住個肚腩，就係曾經「把炮」過，但係收曬皮o既過氣老將，當中代表人物就係富足主喇，雖然大家一直覺得我同富足主狗咬狗骨，但不得不承認，呢位曾經有夏體硬朗拿度之稱既性格球星，斷腳增肥之前的確係跑得又扭得，好似大溪地果個華人前鋒陳秀咁，隨時一個過你幾個，不過結果亦都同陳秀一樣，扭得到、做得到，但無人接應到。
雖然富足主o既傷患已經令佢踢唔到正式o既業餘比賽，但作為足主o既我一直都好想佢能夠重振雄風，o黎緊下個禮拜，我地夏體硬將會挑戰趙俊傑球迷會，到時富足主將會粉墨登場，為o左令富足主挽回一點自信，我已經私底下同趙俊傑講，叫佢當晚見到富足主帶波o既時候，「適度地」放水一下，等佢老人家可以表演下腳法，咁就大家高興啦！
順帶一提，當晚如無意外會係可樂暉守龍，由於可樂暉守大場龍有多次被人笠死既紀錄，預計我地會受讓三四球。
國足主
