當呢篇專欄見街o既時候，副足主已經離開o左我o地……
大家唔好誤會，雖然我一直都好憎佢成日搵位入我迫我退位，有時真係恨不得其死，不過話曬佢都係我前輩，我對前輩們一直相當尊敬，就好似光頭個師父頭哥，叫我幫佢撲曼聯飛，我開埋外掛爆SEED都幫佢班12張番黎，就知道我對前輩有幾好啦！
講番轉頭，副足主其實係離開o左香港，同球隊高層機關槍、黑龍波以及5+HIM遠赴日本，做咩呢？根據佢地所講，係去當地o既日職球會進行實地考察，為夏體硬未來職業化做準備，但實際為乜？鬼知咩。當我早幾日同班隊友踢波o既時候，佢地一聽到呢四條友開公數去日本考察，當堂著曬，話點解人交會費佢交會費，佢地四個掛個名叫高層就有得去日本，其他人就連去日本城買野都要自己科水，唔公平喎！
我都知…不過，又咁講呀，而家我比人架空o左，其實地位就好似光緒呀、溥儀呢d末代皇帝一樣，美其名係皇帝，實際上都係扯線公仔，不過咁，我都KAI唔曬o既，贊助商BILLY不嬲都欣賞我搞球會o既務實同毅力，佢就靜靜雞同我講，話呢四條友去日本，除o左去花紅酒綠之外，仲要去搵一間日職球會，同夏體硬結盟喎，BILLY話，除o左我地球會會費之外，佢地另外亦比o左唔少錢佢地贊助佢地今趟行程，條件係一定要為夏體硬搭到路，搵到間衛星球會。
wow，我就放長雙眼睇下，到時佢地能唔能夠達成任務啦，如果得我都開心o既，唔得既話…嘿嘿