【體路專欄】我哋隊波上星期已經開始參加NTC（NIKE TRAINING CLUB），個個禮拜三成半隊人走去NIKE總部操餐懵，接近一個鐘時間無間斷做帶氧運動同肌力訓練，對於贏左個記協盃冠軍之後開始練精學懶，餐餐大魚大肉既隊員黎講，頭一課已經操到連前一晚餐飯都爭D嘔埋出黎，就好似我地門將小虎咁，頭一課操到尾段已經走埋一邊圓寂，之後仲要同條女遠飛泰國差電，據聞陣中好幾個積極操fit既老臣子相當不滿，小虎離隊既日子可能已經進入倒數階段。
由於富足主真係好富足，已經提早開始佢既退休生活，所以呢期經常有事無事都send msg問我有咩搞，食唔食飯睇唔睇戲，搞到我好鬼老尷，第一我同佢不嬲都無乜計傾，第二係佢一條單身寡佬成日date我，唔知仲以為我做左陶淵明，好在我份人識得say no，唔似而家d乜黨物黨咁口裡說不，身體又那麼誠實，據聞佢轉向蜜運中既阿昌埋手，成功約左佢，兩條麻甩佬走去睇《等一個人咖啡》，唯有希望阿昌力保不失…
不過咁，睇在相識多年，我都係應承左陪佢去尖咀一間薄有名氣既放題食番餐，當晚我地約埋包括體路老總阿FAYE在內幾個老seafood一齊，我同另一位老seafood倩影非常準時，但阿FAYE同富足主就遲左近半個鐘先到，佢地兩個不約而同叫我地食住先，我hi，食過放題既都知去放題呢家野，準時是常識吧？叫我地食住先？咁頭round最靚果轉刺身黎到得兩個人，食唔晒之餘又浪費，況且放題入座斷鐘計，成件事拍得住建制派叫人「袋住先」咁荒謬，結果我就堅拒食住先，等佢地黎到先開餐，見佢地黎到say晒sorry咁，算佢地啦！
計我話，如果一件事根本未傾掂，未準備好，無論食住先或者袋住先，之後有乜問題就算唔關你事都好，因為你呢刻應承去住先，都一樣攬炒架喇，所以呢，大家去到呢d關鍵位，千祈唔好輕易妥協呀！
國足主
