【體路專訊】夏體硬專欄足足停左幾個月，呢幾個月，香港都有唔少風波出現，唏，風波呢家野我都見慣見熟，就好似我同富足主之間既權鬥，根本一秒都未停過。
有留意國內政局既朋友都應該知道，呢期揸fit人雷厲風行係咁打貪打到d貪官現形見血，一時又話要打大老虎，一時又話要慢慢引隻大老虎出黎，劇情絕對係上得HKTV；而有留意開我地夏體硬呢隊波既朋友，都會知道我地隊波裡面都有一隻大老虎，至於係邊個我就唔想開名，免得富足主唔高興。
呢隻大老虎既佳作實在係罄竹難書，我都唔想一一列舉出黎，不過近期有樣野真係唔講唔得既就係，大老虎居然私底下同隊友講，話我食放題食得多食到個人都懵左，無能力落場亦無能力再帶領隊波去踢一年一度既記協盃。
眾所 _ 知，小弟係一個極之喜歡食放題既人，喜歡既程度甚至係冒住俾大老虎笑到面黃既風險開個「放題王」專頁黎談論坊間放題，而我亦好明白狂食放題係會將自己推向中年危機，所以呢兩個月狂操 #NTC之外，我亦特登搵左以嚴厲著稱既港甲球隊橫濱FC教練李志堅，為我地設計專業訓練課程，呢日就拉隊去左麥花臣開操，堅sir收操後更大讚小弟體能fit之餘，技術同意識更加係世界級。
而大老虎今日亦都理所當然地無現身，部份球員亦都借故缺席今課操練，有傳聞佢地已經向大老虎投誠，所以我決定繼續狂操備戰之餘，亦會慢慢清除隊內大老虎勢力，暫時行動代號係「今晚打老虎」。
呢個星期六係我地第一場記協盃分組賽，朝早11點跑馬地草地足球場，小弟已經依靠關係同足總溝通過，賽事將會不收門票免費入場，歡迎大家到場打氣！
國足主
