【體路專欄】「群組」，現時一個很敏感的詞語，此用詞帶有二元性（二元：即有相反或對立的含意，例如：男性／女性、文明／野蠻、白種人／有色人種的二分，簡單來說就係標籤），將別人歸納去一邊，其實就係等如話「唔關我事」。但試問我哋共同生活喺呢個世界，又點可以置身事外呢？
早前有香港運動員確診，當時無乜傳媒炒作，但其實好多運動同跳舞一樣都係一對一，點解係咁話跳舞係高危呢？
再者，跳舞未必係好多人選擇的運動，有人話「只有上年紀的先會去跳」，「運動量不及其他運動」，但香港有代表外出作賽，一定有達到世界水平，希望大家在未認識一件事情之前，最好唔好妄下判斷。
中學時期已經好想學社交舞，覺得人好靚、動作好靚、服飾好靚，接觸過後先知道唔係想像中咁易。
我認為，將每件事做到最好，都可以係一種藝術，跑步可以係，跳舞亦都可以係，每一個Step、每一個擺手動作、每一個眼神都可以透過不斷反覆練習去做到最好，肉體上的訓練同精神上絶對不遜於其他運動。（延伸閱讀：藝術奧運會）
對於大家帶住咩心態去做事，我無權去過問或批評，但得承認呢個世界乜人都有，但斷唔可以「一竹篙打一船人」。
如果有機會，我希望中小學可以普及教授社交舞，等大家可以多啲接觸音樂同埋舞蹈，不但係一個紓壓方法，而且係一個非常好的途徑去讓男女學習相處和互相尊重。就連李小龍都有跳過拉丁。
大自然鬼斧神工，身邊每件事物都係藝術，如果大家識得欣賞，就唔會見到通山有咁多垃圾，長氣啲都要同大家講句『自己垃圾，自己帶走』！
希望大家放低有色眼鏡，Stronger Together！