【體路專欄】話咁快又到一年一度o既NIKE5總決賽，今屆我o地一如以往，都獲邀出席踢表演賽，不過由於富足主有要務在身，當日就會由國足主領軍，如果踢得唔好，不妨盡情奚落佢。
有睇過NIKE5比賽o既球迷，相信都會好認同呢個係本地最高水準o既5人賽，加上贊助商會提供最新裝備畀球員，所以每年我o地都會超額報名，富足主既然今次未能出席，自然就會讓路畀隊友，你估好似國足主咁，傷o左仲要霸住個龍守咩。
亦因為內部競爭激烈，所以近期隊友練波都特別落力，可惜上個禮拜，有「夏體硬小巨人」之稱o既小駿子，就被隊友誤傷，據聞今次傷勢唔單止影響隻腳，仲搞到條孖筋，又壓住o左三叉神經，影響埋左大腦中樞系統，唔單止可能要提早收咧，仲連最喜歡o既上肢運動做唔到。
至於當時究竟畀邊個整傷呢，一眾隊友都三緘其口，富足主已經搵o左金田一個friend馬田七去查下，限佢一個月之內文份報告出o黎，如果有隊員蓄意踢傷人，唔排除採取紀律處分，罰佢交返所有裝備出o黎。
好喇，講返星期日呢場表演賽，就會o係麥花臣夜晚7:30開波，各位球迷可以來指點一下，國足主仲會致送香吻，畀頭100位買飛入場o既人士o添。
富足主
