【體路專欄】冇見一排，又輪到我富足主登場，記得我嗎 有掛住我嗎？
最近呢個專欄好似消息匿跡咁，一來富足主堅係忙，二來國足主又分身不瑕……趁機會交代一下，國足主依家已經喺體記協會高層，據講仲係負責足球、籃球（？）同埋一切文娛康樂事務，即係體記界嘅李美嫦，身居要職嗰隻。
至於夏體硬嘅近況呢，上星期已經踢咗記協盃8強戰，憑住阿Meng連中三元，大勝3比0晉級，總算突破咗上屆成績。當然我哋唔會因此而自滿，因為呢個星期六就踢4強，距離決賽只差一步。
早前我哋派出U50青年軍出戰NIKE5土瓜灣站公開組賽事，結果順利取得小組亞軍，並取得呢個星期日出戰麥花臣表演賽嘅參賽資格。今次嘅比賽，球隊曾經經歷過不幸嘅局面，但同時亦有啲幸運之神嘅幫助。無論如何，下季希望夏體硬嘅小將繼續努力，爭取小組首名嘅資格吧。
今次NIKE5有個發現，佢就係喺分組賽一落場就有入波嘅XXHIM（呢排佢太紅，無謂再響朵捧紅佢）。其實佢本身係踢U40，今年只得3X歲。不過佢身型高大，加上場上成熟而冷靜，點睇都唔似越級挑戰。佢一落場就為夏體硬射入一球，一控一轉身再一下V老篤，非常乖巧，相當精彩。教練認為XXHIM喺今次比賽中表現非常出色，比之前有好大嘅成長，呢啲就係比贏得冠軍更開心嘅收穫。另外門將可樂暉亦有出色嘅表現，至於點好法就唔記咗喇，都係一貫水準咁啦。
無可否認，夏體硬現時有極大的優勢，只要餘下比賽全勝，就可以贏雙料冠軍。不過夏體硬現時先踏入魔鬼賽程，2日踢2場比賽，仲未計國足主屁股痕癢突然加插嘅練習賽，只要一時大意就會前功盡廢。加上全民皆（老）兵，一有乜冬瓜豆腐，國足主就可以專心為體記協捐軀，所以我哋必須非常小心，等錦標到手才說。
