剛剛過去o既星期日，係一年一度嘅NIKE5決賽大日子，我哋作為參賽球隊加上贊助球隊，呢日當然要出一分力啦，當日我哋派出2隊同Milk踢表演賽，結果成功包辦三甲其中2個席位。
隨住規模日漸龐大，前來試腳嘅飛來蜢愈來愈多，今次亦係夏體硬首次派出超過1隊踢NIKE5表演賽。喺國足主提議下，當日我哋分開「經典」同「現役」2隊。富足主同國足主呢啲開國功臣就列入「經典」隊，至於另一隊就由一班年青力壯嘅U40青年軍組成。
當日我哋各有一名試腳球員上陣，「現役隊」就有「珠海卡卡」，而「經典隊」就有積sir壓陣。至於試腳結果，兩位唔使心急住，返去等下電話先，遲啲就會有專人通知大家㗎啦。
表演賽形式係由我哋同Milk踢單循環，根據賽程編排，我哋會先同Milk踢，最後一場先內訌。今次難得富足主同國足主有共識，就係留力最後一場先打真軍，所以對Milk 嗰2場戰果，大家會當粉筆字咁抹咗去，到壓軸戰先當決賽咁打。
花咗大家咁多時間，終於到戲肉啦。好可惜呢場決賽並唔係想像中咁勢均力敵，甚至係一面倒添，真係對大家唔住。結果我班哋經典前鋒喺幾乎零合作性之下，都入咗5球，至於現役嗰班呢，就只入到「正正常常」嘅可樂暉3粒。
富足主喺度有個反建議，如果下年再派2隊嘅話，不如分「富足主邀請隊」同「國足主邀請隊」，戰情一定會刺激好多！（但最好搵埋救傷隊駐場啦）
富足主
