「不怕神一樣的對手，只怕豬一樣的隊友」，呢句說話正正係富足主今周o既心情。
一個專業o既高層，o係事情未完全搞掂之前，唔好對外洩露半點風聲，呢個應該係常識啦啩？點知我o地偉大o既國足主就要逞強，上星期爆o左我同幾位高層去日本傾贊助，結果就o黎得米之際，最後功敗垂成……或者國足主覺得，咁樣可以令佢增加收視，但就唔知佢糟蹋晒我o地成team人o既心血。
其實諗番轉頭，國足主一直嬲o既，就係我o地冇事先通知佢會出去傾o野，同埋「開公數」（？）喎。唔係佢提一提，我都唔知我o地原來可以開數，等張月結單出o左，我實交畀佢，叫佢借定財仔都得喇。
其實我o地今次目的地去橫濱，唔係傾贊助，而係一心諗住跟橫濱FC練波，冇錯，係練！波！再順便同老友Kazu打個招呼。係呀，我細細個就識佢o架啦，至於佢識唔識我，下次你o地自己問佢。
講番正題，大家有留意本地波消息，都知道橫濱FC（香港）派o左幾個球員過去跟操。咁夏體硬既然亦係Nike贊助，梗係搏大霧埋去練埋一份。點知國足主懶醒，一早爆o左料，搞到對方唔多like，最後就梗係唔成事啦。唉，富足主本來仲想埋山口素弘身，向佢請教o下日本o既磨菇型戰術，家陣連磨菇柄都未學到，就要打道回府，真係殘念。
富足主
