經過煩忙o既半個月之後，富足主今個星期生活終於可以回復正常，係時候同大家交代下會務喇。
嗱，富足主做o野就唔會好似某o的有角o既足主咁，未成事就大咀巴周圍唱（你估真係有角就快3倍咩），所以今期遲o左幾日先出，就係要過o左星期四，等一切成o左事先公布。
好，入正題。今次要公布o既，就係球員加盟消息。其實fb有add角足主都知道喇，無錯，就係向來重視青訓（不過係U50）o既夏體硬，成功簽入剛出世100日o既高晉，相信呢單亦係史上最年輕o既一單轉會。至於高晉個o的個人資料，例如曾效力球會、身高、體重等等，就留待遲下記招公布。
今次交易之所以成功，先要多謝高晉老豆，即係高超，先會成事。其實當富足主知道高超做老豆之後，已經好有誠意收購佢個細路仔。總之生仔就做球員，生女就做打氣baby，生舊叉燒就做吉祥（食）物，點都簽硬o架喇。或者就係呢份誠意打動到高超，o係星期四晚終於達成協議，仲同角足主合照為證。嗱，有圖有真相，真係有慈姑椗o架！
P.S. 轉會費已入o左落封人情度，足主識做啦。
富足主
