【體路專欄】呢個世界呢，做好人呢，真係無好報架，好似呢期專欄咁啦，明明呢就唔係我寫既，點知呢有人星期一話頭痛，星期二話眼痛，星期三話頸痛，星期四話肚痛，星期五又話便秘，如是者過左差不多成個月，都未交到稿，大家都知我份人最有責任心，加上夏體硬又有比賽，所以我決定拎番個專欄黎寫，至於果個人係邊個？唔講啦，大家心照！
今個星期六，本年度NIKE 5 第一站就會係土瓜灣舉行，我地今年照例有派隊參賽，為左應付呢個賽事，我地呢個幾月幾乎每個禮拜都集體操練，除左體能之外，連陣形戰術都重新摸索，所以大家都對今屆賽事有D期望，希望重溫幾年前分組賽出線既舊夢。
講下講下大年初一都就快到，又係一年一度賀歲盃上演既時候，仲記得舊年公民打到入決賽，觀眾拍爛手掌幾好氣氛，事後仲一度傳話昆卡隊長有機會黎香港搵食，搞到成地都係碎片但最終又唔成事，今年黎香港既紐約宇宙，陣中最出名既係魯爾，不過魯爾真係老矣喇，成37歲幾，要睇佢好似以前咁入完一粒又一粒，真係要睇彩數，而呢隊波除左佢之外，剩係得維拉利爾前隊長冼拿比較多人熟悉，其他人連奀星都稱唔上，不過公道D睇，舊年昆卡黎香港之前，基本上連一粒奀星都數唔到，最終都可以做到有D口碑有人讚好，話唔定今屆賀歲盃又有驚喜呢？
油王張話當日會向入場女士派1000支厄瓜多爾玫瑰，究竟厄瓜多爾玫瑰真係咁吸引定還是呃你老襯入場，不妨買飛入場睇睇，反正今年正價飛一舊水，有魯爾有花收，算係咁啦！
國足主
