今年記協盃冠軍，係Hartiend FC，亦即係我地，夏體硬。
開唔開心？開心。興唔興奮？興奮。
成軍咁多年，大家終於做到咁多年o黎o既目標，球隊上下包括一直鬧不和o既我富足主，都非常感觸，無錯，當我同富足主一齊拎住獎盃影合照時，隊友們一句貌合神離就拆穿左我地表面和睦o既西洋鏡，尤其是賽前一日，我狠下決心o係FB留STATUS話，贏唔到記協盃就即刻辭職，有人開心到立即cap圖驚死我輸波走數叫我「自吻膀胱」，佢當下睇住我捧起獎盃，嘴角泛起勝利的微笑，內心有幾葡萄同難堪我相當明白，不過呢，勝者為王，敗者為寇，權力鬥爭總會有人走出歷史舞臺，世事往往就係咁殘酷。
好喇，開心野暫時講到呢度。
下？有咩唔開心呀？有呀，有睇我地決賽條片o既朋友都知，當日決賽，踢到下半場，我地領先緊2:0時，發生o左一件不愉快事件，事緣係我地後備上陣o既前鋒強仔，同對方後衛爭波，然後對面位人兄推跌強仔，再一腳踩落強仔心口（要記住，當時佢係著緊釘boot），球證當時遲兩秒吹罰，吹罰之後，我地主將曉明入波，咁球證點樣處理呢件事呢？
對面踩人果個紅牌，強仔無還拖，都紅牌，而個波就計入o左，即係我地3:0。
根據採訪甲組多年o既富足主場邊表示，計賽例，球證應該判球波唔入，判9碼，而應該比紅牌邊位相信小學生都答得到，在此不贅。
球證作出咁o既判決，當然我地極度不滿，但當下我地都尊重球證判決，即刻準備換人變陣，有乜事都等場波完o左先講，不過對手就選擇拉隊離場，最後場波就咁吹雞完場，我地贏3:0。
一直以o黎，我都好希望見到球證吹完場雞，成班隊友衝出去慶祝呢一幕，但就因為發生件咁o既事，好夢落空；更難堪o既係聽到場邊有人話：還掂都係輸0:3，咁倒不如當初唔好o黎踢直接比人贏啦…原諒我份人單純，我真係唔能夠理解呢種思維，件事擺到明就係我方球員比人推低用腳踩，係襲擊行為，我諗無論邊個級別，職業或業餘聯賽都會召開紀律研訊睇睇洗唔洗追加停賽判罰，但點解出事之後要講到我地係理虧o既一方呢？堅係難明，而呢件事亦影響o左大家捧盃o既心情，未能盡興鳥。
P.S事件似乎還有後著，下期專欄就由富足主為大家跟進下
有興趣睇片o既朋友可以上youtube，打fc hartiend再search就搵到
角足主
(編者的話：細心的《體路》編輯部已為讀者送上精彩賽事片段)