又到o左抖暑時間，對於夏季成立o既夏體硬o黎講呢，就梗係全年無休啦，不過成呢排天氣反反覆覆，就搞到富足主成個月冇波踢，目測應該又月巴o左10磅。
有追開呢個專欄o既讀者都知，體記每個星期二都會租場練波。記得富足主入行時，體記就係植根於跑馬地中間o個兩個人造草場。之後由於會員太踴躍，經常o係個7人場10打10，於是就連根拔起去o左界限街，間唔中又踢o下樂富。之但係由於當時 marketing 宣傳不足，搞到成日唔夠人，更試過多次只係踢半場射燈箱，於是又將主場改到去櫻桃街。
家陣o既櫻桃街，已經回復番以前o既熱鬧，更要租兩節時段先夠喉。至於係唔係夏體硬宣傳有功，富足主就唔敢妄下判斷，但就想借呢度反映一o下，點解體記足球發展o左咁多年，仲係得唔 到政府支持？以呢個月為例，4個星期二之中，體記只有2日租到兩節，其他時間只係得1節，即係得個半鐘，仲未計一落雨就有人選擇性封場（唔係講小虎），試問點樣可以推動足運呢？
09年港足贏到東亞運金牌，逼使政府做o野，推行鳳凰計畫（計劃是否成功不在本文討論範圍之內）；夏體硬今年歷史性捧走記協盃，角足主又有冇為我o地爭取下呢？求其整個「洞房」計劃都好o丫！
富足主
