終於忙完2015香港泰拳冠軍爭奪戰總決賽，呢3個月真係忙到頭都大，心情好波動，再次證明教拳，真係一啲都唔易！
為準備今次賽事，早喺3個月前，我已安排特訓畀4位參賽拳手。除咗一般嘅體能、技術訓練，其實我各自仲要再操佢哋，因為每個人嘅性格、特性、能力、優點同缺點都唔同。
有啲拳手自信不足、懶散、性格被動，要調教呢啲拳手，需要激將法，可惜我無乜耐性，有時真係畀佢哋反轉頭激到我噴血噴火；不過一本書唔可以讀到老，激將得嚟有時都要循循善誘、好聽啲叫軟硬兼施，俗啲就叫一嗒沙糖一嗒屎，畢竟運動員始終係人，都有情緒同感情，我嘅責任就係唔可以畀佢哋自視過高、亦唔可以自卑，幫拳手調校到去一個平衡點，真係一個好大嘅學問。
好多人以為我好重拳手嘅成績，實際根本唔係，佢哋有幾多實力我心中有數，我反而著重拳手喺比賽中，可唔可以打出平時練習七或八成水準，因為咁先睇到拳手有冇喺訓練中有得著、有領悟、有消化到我講、我教嘅嘢。
回顧上星期2015香港泰拳冠軍爭奪戰總決賽，榮拳館派出Vicky鄧穎瑜、Nana曾海蘭、Cherie文善彤同Ronald張浩政出戰，結果3名女拳手勝出，Ronald亦只係點數落敗，可是各人表現發揮都總算過得去，我也總算可以來個短假期休息一下！學如逆水行舟，不進則退，希望大家都可以從我今次篇文中有所領悟！
