【體路專欄】呢個星期香港體壇發生o左幾單大新聞，忙到專欄又脫期，認真唔好意思。
咁多單大o野之中，最惹人關注o既，梗係夏體硬場記協盃啦。我o地上星期踢o左今屆第二場分組賽，結果憑新加盟o既阿Meng連續第二場開出首名入球，加上回巢o既朱楓下半場埋齋，以2:0小勝傳媒朋友，小組二連勝。
已被踢出隊o既可樂暉賽後就懶係心水清，話夏體硬已經保持o左跨季N場不敗，失球數字亦只得1球，應該係我o地成軍以來o既最好一段走勢。話雖如此，但有睇直播o既球迷都睇得出，其實夏體硬暫時仍未表現出霸氣，仲有好大進步空間。
國足主不嬲唔屬於要求高o既人，從佢賽後大派開操利是o既浮誇表情o黎睇，更似乎十分滿意呢兩場自己領軍兼落埋場抽水o既表現。之但係富足主就唔係咁睇，尤其球隊上屆拎o左冠軍，理應對自己有更高要求。講講o下忽然覺得夏體硬有o的似紅衫o個隊波，無錯，波係贏到，但表現仲係唔夠完美。不過所謂用人勿疑，就算有球迷覺得國足主唔應該做教練都好，富足主仍然會畀機會佢。
睇返餘下賽程，夏體硬下一場記協盃就係22號舉行，我o地o係櫻桃街主場迎戰亞視，不過適逢當日亦係NIKE5大日子，所以我o地會兵分兩路，保持兩條戰線都有最強人腳出戰。大家唔使驚我o地分開兩隊之後實力會變弱，相反，季前組軍時已有「全民皆兵」o既計畫，富足主好有信心可以兩邊兼顧。
另外，對於不斷有球迷INBOX我，要求重用年輕球員「小駿子」，富足主o係度強調，我絕對唔會左右國足主o既決定，而且亦深信，旗下球員唔會因為一、兩次有好表現就有正選，佢o地一定要畀到教練團信心，先有機會落場，大家真係唔使為佢o地操心。如果再有人INBOX我，信唔信即刻BAN你丫嗱！
（版位所限，#giveme5000活動留待下回分解）
富足主
