新一年首次同大家見面，富足主先代表夏體硬祝各位球迷腳腳七注，守龍o既就其門如市（對我o地時）。
今個星期六，即係年初七，就係記協盃準決賽o既大日子，我o地朝早10:15就會o係跑馬地12號場同TVU爭決賽席位。今屆賽事打到呢個階段，老老實實，係有少少意料之外。事關目前剩番o既4強份子，有3隊都係以小組次名出線，幾支賽前被看高一線o既球隊，都已經大熱倒灶。而上屆o既最後4強，更加係死剩我o地一隊。
由於撞正新年假期同埋賀歲盃，我o地今個星期o既練習亦大受影響，好在o係過年之前先安排o左特訓，我o地將球員分成3隊波，然後混合埋其他行家，分別挑戰過屯門教練隊、和富大埔同埋橫濱FC（香港），先後同梁帥榮、韋海英、陳旭智、同埋福田健二（冇錯，係o個個前日本小國腳）等前度或現役球星交手，戰績分別係1勝1和1負（有錯請指正）。老土o的講句，戰果並唔重要，最緊要就係畀大家有比賽機會，keep住比賽狀態。
至於星期六場波有咩部署，相信足主已經心中有數，富足主不嬲少說話多做事，所以o係年初二就特別搵車公求o左支簽。支簽係第46上簽，簽文係：
根深不懼風搖動
流濁誰知原是清
官有正條民有理
何愁無事不分明
既然係上簽，照計應該唔使愁啦，不過睇番解簽篇文，竟然有句「勝算雖大，以和為貴更佳」。
唔通個天又想肥超做英雄？
PS
to足主：個app盛惠$28，張單稍後會寄去你屋企
富足主