【體路專欄】之前講過吓 Training 次序嘅神奇效果，唔知大家有冇試過呢？（我諗大家都一窩蜂死跟）但講過絕望真相你知，或者你都已經發現：「點解對我好似冇乜用，但隔離條友又勁咗咁多嘅？」
係丫～可能你已經輸咗喺起跑線！
按步就班—推前條起跑線！
話說我哋其中一個，細個仔時期係唔做運動＋體能極廢（唔講邊個啦），好多動作係明白，拆到好散係可以做到（但一合返埋就ByeBye～）。大個啲嘅時期，開始玩得勁勤力（一星期一定有七次或以上），但進步龜速，到大過哂先知，原來自己輸咗喺起跑線…
雖然你而家冇，但將來可能會有，因為呢條起跑線係可以追到—你嘅”基本力量”（Basic Strength) 。由於嗰個人細個完全冇運動底，加上勁文靜，所以係冇力量可言。當突然想玩運動，就算勤力幾倍都好，都只會勁挫敗。
其實都有研究講過力量嘅影響，例如之前講嘅訓練次序。雖然次序會影響效果，但最影響效果嘅，反而係你本身嘅基本力量—Basic Strength 愈高，進步就愈多。亦因為咁，就算嗰時做足七日訓練，進步都係極之廢。但當做返適當力量訓練後，訓練嘅成本效益就大增。
簡而言之，當你有明確嘅運動目標後，唔好即刻諗著玩花式，望吓自己條起跑線喺邊度先。基礎太差，就算畀個球星嘅Program 你都嘥氣啦！
Reference：
Duthie GM, Young WB, Aitken DA. The Acute Effects of Heavy Loads on Jump Squat Performance : An Evaluation of the Complex and Contrast Methods of Power Development. J Strength Cond Res. 2002;16(4):530–8.
Kobal R, Loturco I, Barroso R, Gil S, Cuniyochi R, Ugrinowitsch C, et al. Effects of Different Combinations of Strength, Power and Plyometric Training on the Physical Performance of Elite Young Soccer Players. J strength Cond Res. 2017;31(6):1468–76.