各位球迷大家好，今次係我富足主首次o係「體路」同大家見面！以後請多多指教！
有追開我o地專欄o既朋友都知道，我o地以前只係o係文字傳媒出現（邊本無謂講喇，反正o個本Soccerwave又唔係我o地贊助商），點解今次無啦啦轉場，仲要本人出山寫埋一份呢？其實有段古o既，話說有一日，角足主通知在下，話我知個專欄保唔住，要cut喇，但就神神秘秘咁，無講明原因。
唉，真係當我傻的嗎？富足主我做o左咁耐人，又點會收唔到風呢！有傳聞話，角足主一直「揸住雞毛當令箭」，已經令好多隊友不滿，自從寫埋專欄之後，就直情當支筆係利劍，將一o的唔順從佢o既隊友，例如可樂暉、5+him、同埋本人咁，斬o下一個斬o下一個，嚴重影響本隊形象。Soccerwave揸弗人叉哥向來係明事理之人，同夏體硬各隊友亦不時有文學切磋，為免傷及隊中和氣，於是咪借勢將個欄河蟹o左囉。
於是一眾隊友就推我出o黎，叫我搵個新地盤，希望日後有機會的話，就幫眾人平反。所謂我不入地獄誰入地獄，不過為免令「角粉」傷心，就未有將角足主一刀切，以後一人寫一個禮拜。或者有人會問，可樂暉同5+him就話有粉絲o者，呢件角足主何德何能呀？本來富足主都有咁o既疑問，之但係自從前隊友劉安迪擺酒當晚，有人兜口兜面認係角足主Fans之後，就真係唔信都唔得喇。
唔理呢位「角粉」係真心定老臨都好，要知道o係大庭廣眾自認係角足主Fans，係需要幾大勇氣至得！既然呢排潮流興出櫃，我奉勸角足主下一期都最好開誠佈公，對大家講出心底話啦！
富足主
