減肥駛唔駛戒碳水化合物？

【體路專欄】唔經唔覺studio已經開咗個幾月喇，係呢段時間除咗一班舊有嘅朋友仔之外，仲多咗好多新嘅朋友仔，但係不論新嘅舊嘅，大部分都有共同嘅目標 – 減肥。

從朋友口裡或一啲網站都會話減肥要戒碳水化合物，每次聽到呢類說話我都覺得呢類訊息真係累死人！

首先大家要明白到“減肥”係要減去身體嘅脂肪而唔係肌肉，我地係可以（要）透過做帶氧運動去減低身體嘅脂肪率。

咁當然我地需要能量先有足夠嘅力氣去做運動啦 ，而我地就需要碳水化合物去提供能量比我地喇，而且可以話係“好需要”，因為我地一日大部分嘅能量來源就要係碳水化合物度來，況且燃燒脂都要能量架！

如果缺少咗碳水化合物會令我地身體嘅水分流失、失去集中力同增加食慾，所以如果你有朋友係戒碳水減肥嘅話，你可以留意吓佢地嘅皮膚係咪好乾、同成日吽吓吽吓咁。

以近年一啲爆肌嘅藝人為例，大家之前見佢係肥仔一名，當佢做完一輸gym、戒碳水化合物同每日跑一小時出來瘦咗嘅效果，大家只係應為戒碳水就得，而skip咗佢都要做運動果part，淨係抽咗自己想睇果段出嚟，人地都係有做重力訓練配合先得。

要減肥，阻力訓練（重力訓練）同帶氧運動係需要兩者配合嘅，尤其係最緊要快見效嘅香港人，係ACSM 2010嘅體適能指引，一星期最好進行3-5次，每次最少20分鐘嘅帶氧運動，當你跑夠30分鐘再連埋熱身都係一個鐘頭左右姐，基本上可以話你唔抽時間做吓帶氧運動，減肥就唔駛諗喇。

與其大家成日諗縮數想唔駛做運動就減到肥嘅，你又睇吓塊鏡，唔食飯嘅你又真係瘦咗幾多？線條去咗邊？又或者浪費咗幾多錢去買減肥產品……？又得到啲咩？？

減肥/練大隻都係一個要長期keep住嘅大project，相信那些一個月減十幾廿磅嘅product，咁倒不如認認真真安排一下運動時間表，食個飯再動起來啦！

**想知更多體適能資訊可到我的Facebook Page “高級私人教練 Jerry Liu”，多謝支持!!